Maxkamada ciidamada qalabka sida ee dowlada Soomaaliya ayaa saakay xukun dil ah ku riday Sargaal katirsanaa ciidanka Badda Soomaaliya oo horey u dilay taliye kuxigeenkii Ciidanka badda Soomaaliya.

Maxkamada ayaa dhageesatay Dambi ciqaabeed dil ah oo loo heestay Cabdi Naasir Xoosh Maxamed oo katirsanaa Saraakiisha ciidanka badda, waxaana Maxkamada ninkan ku heshay in si ula kac ah u dilay Taliye kuxigeenkii ciidanka badda General Siciid Aadan Dheere (Siciid Mariino).

Gudoomiyaha Maxkamadda Darajadda Koowaad Ciidamada Qalabka Sidda Xasan Cali Nuur Shuute ayaa warbaahinta u aqriyay xukunka dilka ah ee lagu riday  Gaashaanle Sare C/naasir Xoosh .

Sargaalkan Xukunka dilka ah saakay lagu riday ayaa 18-kii bishii Janaayo ee sanadkan gudaha Dekadda Muqdisho ku dhax dilay Taliye kixgeenkii ciidanka badda Generaal Siciid Mariino kadib markii ay murmeen.

Maxkamada Ciidanka qalabka sida ayaa horey sidan oo kale xukuno xikuno dil ah ugu riday saraakiil iyo ciidamo katirsan dowlada oo lagu helay in ay dilal ugu geestaan askar kale iyo dad shacab ah.