Howlgalka Midowga Yurub ee Soomaaliya, ayaa waxaa uu rajo wanaagsan ka muujiyay inuu dhaqan-galo qorshaha kala guurka ee dalka uga baxayaan ciidamadda AMISOM, laguna wareejinayo amaanka kuwa Soomaaliya.

War-saxaafadeed uu soo saarey Howlgalka Midowga Yurub, ayaa waxaa kaloo lagu ifiyey inay diyaar u yihiin sii waditaaganka taageeradda ay siiyaan AMISOM, inta ay mas’uuliyadda amaan kala wareegayaan ciidanka xooga dalka [SNA].

EU-da ayaa sheegtay in tan iyo markii ay ciidamadda AMISOM soo galeen Soomaaliya sanadkii 2007-dii ay ugu deeqeen aduun lacageeda dhan 1.73 Bilyan oo Dollar-ka Mareykanka, ayna ka go’an tahay inay sii wadaan kaalmada.

“AMISOM waxay ka shaqeynaysaa nabad Soomaaliya, walina way u heelan yihiin inay sii wadaan, illaa iyo uu ka dhaqan-geliyo qorshaha kala guurka ah ee amaanka loogu wareejinayo ciidamo Soomaaliyeed ah,” ayaa lagu yiri bayaanka Midowga Yurub.

Sanadka 2022-ka ayuu qorshuhu yahay in ciidamadda Midowga Afrika ee AMISOM ay isaga hayaamaan gabi ahaanba Soomaaliya, inkastoo ay ka muujiyeen mas’uuliyiinta AU-da qorshaan walaac badan, iyagoo qiil uga dhigay in aysan Soomaaliya u diyaarsanayn.

Dowladda Soomaaliya ayaa hadda wada dadaalo ay ku dhisaneyso ciidamo, kuwaasoo la doonayo in mas’uuliyadda amaan ee guud ahaan wadanka ay kala wareegaan ciidamadda Midowga Afrika, kuwaasoo in ka badan 10 sano dalka joogay.