Chelsea ayaa Stamford Bridge ku soo dhawanaysa kooxda uu macalinkoodii hore ee Jose Mourinho hogaaminayo ee Manchester United kulanka ka tirsan todobaadka 9-aad ee Premier league waxayna labada kooxood kulankan iskeenayaan iyaga oo ku jira laba xaaladood oo gabi ahaanba kala duwan.

Chelsea ayaa kulankan iskeenaysa iyada oo ku jirta xaalad caafimaad qab iyo kalsooni buuxdaa ku dheehan tahay kadib markii ay noqotay kooxda kaliya ee Premier league ka ciyaarta ee aan ilaa hadda xili ciyaareedkan wax guuldaro ah soo arag tartamada oo dhan.

Chelsea ayaa haysata 20 dhibcood oo Premier league ay kaga soo shaqaysatay siddeedii kulan ee ugu horeeyay waana 6 guulood iyo 2 barbaro ah iyada oo si wada jir ah dhibco ula wadaagta kooxaha Liverpool iyo Manchester City, waana kulan muhiimad khaas ah u leh saddexda kooxood ee kaalinta kowaad isku haysta.

Laakiin Manchester United ayaa kulankan iskeenaysa iyada oo walwal badani haysto kadib markii ay 13 dhibcood ka soo heleen siddeedii kulan ee Premier league ugu horeeyay waxayna Red Devils garoonka Stamford Bridge imanaysaa iyada oo kaalinta 8 aad kaga jirta miiska kala saraynta horyaalka Ingiriiska.

Jose Mourinho ayaa dib ugu soo laabanaya Stamford Bridge oo kulankiisii ugu horeeyay ee Man United uu ceeb wayn kala soo kulmay wuxuuna markan rajaynayaa in uu natiijo fiican ka soo helo inkasta oo uu walwal badan ka qabo in ceeb kale oo dhabar jab ahi ay ka soo gaadhi karto kooxda uu Sarri horumarka fiican ku sameeyay.

Manchester United ayaa ilaa kaalinta 11 ee Premier league u dhici karta haddii ay guuldaro kala soo laabto Chelsea isla amrkaana ayna guuldaraysan kooxaha Watford, Leicester City iyo Everton, waana arinta ugu xun ee ay jamaahiirta United ka cabsi qabaan in kooxdoodu ah sii quusto miiska kala saraynta Premier league.

Sidoo kale haddii ay Chelsea guuldaraysato waxay lumin doontaa cadaadiskii xooganaa ee ay ku haysay kooxaha Manchester City iyo Liverpool kuwaas oo rajaynaya in kooxda Sarri ay dhibco lumiso isla markaana ay guulaystaan kulamada ka sahlan kulanka Stamford Bridge ee ay ciyaari doonaan.

XOGTA KULANKA:

Tartanka: Kulanka 9 aad ee Premier League

Kulanka: Chelsea Vs Man United

Garoonka: Stamford Bridge

Waqtiga: 2:30 Saacada Barriga Afrika

Garsooraha: Mike Dean

Ka Daawo: axadledirect.com